Олон улсын CESIM_Global_Challenge симуляци онлайн тэмцээнд ҮБХИС-ийн багш нар амжилттай оролцлоо Монгол улсын эдийн засаг, бизнесийн хөтөлбөр хэрэгжүүлдэг их, дээд сургуулийн багш нарын дунд анх удаа зохион байгуулагдсан #CESIM_Global_Challenge тэмцээнд ҮБХИС-ийн ЭЗМТ-ийн дэд профессор багш Б.Мөнхжаргал, багш Д.Гандолгор, Б.Баянхишиг, ахлах багш Ш.Гантуяа, профессор багш Д.Энхчимэг нар сургууль, тэнхимээ төлөөлөн оролцсон юм. Симуляци буюу сургалтын шинэ цахим модулиар Монгол улсын эдийн засаг, бизнесийн чиглэлийн хөтөлбөр хэрэгжүүлдэг их сургуулиудийн багш нарын 8 баг гар утасны Глобал зах зээлд (АНУ, АЗИ, ЕВРОП) 10 үеийн турш шийдвэр гарган 8 өдөр, 191 цаг тасралтгүй өрсөлдөв. Тэмцээн англи хэл дээр явагдаж, глобал зах зээлийн эрэлтийн төлөвлөлт, үйлдвэрлэлийн төлөвлөлт, үйлдвэрлэл, маркетинг, хүний нөөц, R&D, нийгмийн хариуцлага, ложистик, татвар, санхүүгийн хүрээний иж бүрэн шийдвэр гаргаж, АНУ, Ази, Европын зах зээлд гар утасны технологийн компанийхаа стратегиар өрсөлдсөн юм. Өнөөдөр дэлхийн 6 тивийн 50 гаруй орны 500 гаруй сургалтын байгууллага, бизнесийн салбарт өргөн хэрэглэгдэж байгаа #CESIM_Business_Simulation-ийг Монгол улсад амжилттай хэрэгжүүлэх эхлэлийг ийн манай их сургуулийн багш нар тавилцсанд баяртай байна. Хөтөлбөрийн сургалтад үнэтэй хувь нэмэр оруулж чадахуйц их зүйл сурч мэдсэн, дэлхийн хөгжилтэй хөл нийлүүлэн алхах боломж байгааг олж харсан, цаашид сурч, хөгжих тэмүүллийг бий болгосон ач холбогдолтой тэмцээн болсныг багш нар онцлов. Тэмцээнд оролцох боломжоор хангасан ҮБХИС-ийн захирал, бригадын генерал П.Жаргалан, Багшийн хөгжлийн төв, АБС-ийн захирал, хурандаа Э.Нацагдорж, тэмцээнд оролцох санаачлага гаргасан ЭЗМТ-ийн дарга Д.Сарангэрэл болон сургууль, тэнхимийн хамт олонд багшийн хөгжилд хувь нэмэр оруулсан Та бүхэндээ дахин талархал илэрхийлье.
ҮБХИС-БАГШИЙН ХӨГЖЛИЙН ТӨВ