Монгол Улсын “Цэргийн албаны тухай” хуулийн 7.6-д “ Цэргийн сургуулийн оюутан суралцаж байх хугацаандаа цэргийн мэргэжил олгох сургалтад хамрагдаж, цэргийн мэргэжил эзэмшсэн бол түүнийг хугацаат цэргийн алба хаасанд тооцож, цэргийн нэгдүгээр зэргийн бэлтгэл үүрэгтнээр бүртгэнэ” гэж заасан байдаг.
Дээрхи хуулийн заалтыг хэрэгжүүлэх үүднээс “Цэргийн сургуулийн оюутанд цэргийн мэргэжил олгох сургалтын журам”-ыг Батлан хамгаалахын сайдын тушаалаар баталсан бөгөөд сургалтын хөтөлбөрийг ЗХЖШ-ын даргын тушаалаар баталж, 2017-2018 оны хичээлийн жилээс эхлэн өнөөдрийг хүртлэх хугацаанд хэрэгжилтийг ханган нэгдүгээр зэргийн бэлтгэл үүрэгтнийг бэлтгэж ирсэн. Энэхүү сургалтын үндсэн зорилго нь Монгол Улсын Үндсэн хуулиар хүлээсэн цэргийн алба хаах үүрэг бүхий Үндэсний батлан хамгаалахын их сургуулийн АБДС-ийн бакалаврын өдрийн ангийн оюутнуудыг суралцаж байх хугацаанд нь цэргийн мэргэжил олгох сургалтад хамруулж цэргийн алба хааснаар тооцон 1-р зэргийн бэлтгэл үүрэгтнээр бүртгэх тухай хуулийн заалтыг хэрэгжүүлэх, цэргийн мэргэжил эзэмшүүлэх нөхцлийг бүрдүүлэхэд оршино. Сургалтын хөтөлбөрийг амжилттай хэрэгжүүлж эхэлсэнээс хойш өнөөдрийн байдлаар 810 оюутанд ЦМД олгож цэргийн алба хааснаар тооцон бүртгүүлээд байгаа юм. 2024-2025 оны хичээлийн жилд төгсөх ангийн 38 оюутан “Цэргийн мэргэжил олгох сургалт”-д бүрэн хамрагдаж бэлтгэлээр халагдсан юм. Сургалтад амжилттай хамрагдсан төгсөх ангийн оюутнуудад “Цэргийн мэргэжлийн гэрчилгээ” гардуулах ёслолын ажилгааг амжилттай зохион байгууллаа. ҮБХИС-ийн Цэргийн албаны хэлтсийн дарга хурандаа С.Эрдэнэ-Уянга, АБДС-ийн захирал хурандаа Б.Ганзам, Эрдэм шинжилгээ, сургалтын албаны дарга, дэд захирал Г.Балжинням, Цэргийн албаны ахлах офицер дэд хурандаа Н.Төгсбаясгалан нар оюутнуудад гэрчилгээг гардуулж өглөө.
