Монгол улсын цэрэг, аюулгүй байдал, батлан хамгаалахын болон төр, хувийн хэвшлийн бүхий л салбарын өндөр мэдлэг, чадвар, ёс зүй, хүмүүжил төлөвшлөөр тэргүүлэгч, шилдэг хүний нөөцийг сурган бэлтгэдэг Аюулгүй байдлын дээд сургуулийн “Эрдмийн баяр-2024” 26 дахь удаагийн төгсөлтийн баярын үйл ажиллагаа боллоо.
Ёслолын ажиллагаанд Батлан хамгаалахын яамны Төрийн захиргааны удирдлагын газрын дарга, шинжлэх ухааны доктор хурандаа Р.Энхболд, ЗХЖШ-ын Нэгдүгээр орлогч дарга бригадын генерал Ж.Өсөхбаяр, ҮБХИС-ийн захирал, профессор бригадын генерал П.Жаргалан, Сургалт, цэргийн алба хариуцсан тэргүүн дэд захирал бригадын генерал С.Дашзэвэг, Аюулгүй байдлын дээд сургуулийн захирал хурандаа Б.Ганзам болон АБДС-ийн тэнхимийн дарга, багш нар, төгсөж буй нийт төгсөгчдийн гэр бүлийн төлөөлөл оролцлоо.
ҮБХИС-ийн Аюулгүй Байдлын дээд сургуулийн захирал, хурандаа Б.Ганзам “Эрдмийн баяр-2024” 26 дахь удаагийн төгсөлтийн арга хэмжээг нээж нийт төгсөгчдөдөө халуун баярыг хүргэсэн юм.
2024 онд төгсөж буй АБДС-ийн оюутан суралцагчдын хувьд сургалт, эрдэм шинжилгээ, судалгаа, инновацын хөгжилд бодитой хувь нэмэр, амжилт бүтээлээр манлайлсан жил байлаа.
“Шилдэг оюутан” медалиар Эдийн засаг, менежментийн тэнхимийн М-403 бүлгийн оюутан Б.Оюу, Олон улсын харилцаа нийтийн удирдлагын тэнхимийн ТУ-410 бүлгийн оюутан Э.Энхзаяа нар энгэрээ мялаалаа.
Мөн ҮБХИС-ийн бүрэлдэхүүн сургуулиуд, алба, хэлтсүүд жил бүрийн төгсөлтийн баяраар АБДС-ийн шилдэг төгсөгчдөд сургууль, алба, хэлтсийнхээ нэрэмжит шагналыг гардуулдаг уламжлалтай бөгөөд манлайлагч оюутнуудыг шагнаж урамшууллаа.
Нийт төгсөгчдөдөө хүн бүр үндэсний хэл, түүх, соёлынхоо дархлааг бэхжүүлэхийн төлөө цохилох зүрхтэй байж, туурга тусгаар улс орныхоо үндэсний эрх ашиг, аюулгүй байдал, батлан хамгаалах судлалаар мэргэшин, эх оронч үзэл, хүмүүжлийг ажил, амьдралынхаа эрхэм зорилго, гол чиг шугам болгон хэрэгжүүлэхээс гадна төрөлх сургууль, эрдэмтэн багш нартайгаа ямагт ойр дотно холбоо харилцаатай байж, итгэл найдвар, нэр төрийг ямагт өндөрт өргөж яваарай гээд ирээдүйн ажил, амьдралын тань алтан шар зам үргэлж өөдрөг, бүтэмжтэй байхын өлзийтэй ерөөлийг өргөн дэвшүүлье.
